काठमाडौं: हिउँदका महिना सुरु भएसँगै मुलुकका विभिन्न औद्योगिक क्षेत्रमा अघोषित लोडसेडिङ सुरु भएको छ । केही वर्षदेखि मुलुक लोडसेडिङमुक्त बनेको थियो ।
नेपाल विद्युत प्राधिकरणले बिहान र साँझ गरेर दैनिक ९ घण्टासम्म उद्योगमा बत्ती कटौती गर्न सुरु गरेको हो । भारतबाट आयातीत विद्युतमध्ये करिब एक सय मेगावाट अवरुद्ध भएसँगै औद्योगिक क्षेत्रमा अघोषित लोडसेडिङ सुरु भएको हो ।
उद्योगीहरुका अनुसार बुटवल-भैरहवा, पोखरा, वीरगन्ज, विराटनगरलगायतका औद्योगिक क्षेत्रमा लोडसेडिङ सुरु भएको छ ।
भैरहवास्थित अर्घाखाँची सिमेन्टका सञ्चालकसमेत रहेका नेपाल उद्योग वाणिज्य महासंघका पूर्वअध्यक्ष पशुपति मुरारकाले औद्योगिक क्षेत्रमा हाल दैनिक ९ घण्टासम्म लोडसेडिङ भइरहेको जानकारी दिए ।
यो समाचार आजको कारोबार दैनिकमा प्रकाशित छ ।
