बझाङः आज दिउँसो बाजुरालाई केन्द्र बनाएर गएको भूकम्पको धक्काले बझाङमा दर्जनौं घर भत्किएका छन् । जिल्ला प्रहरी कार्यालय बझाङका अनुसार भूकम्पमा परी एक जना घाइते भएको र जिल्लाका सबै पालिकाका कतिपय भौतिक संरचनामा क्षति भएको छ । बाजुराको हिमाली गाउँपालिका बिच्छ्याँको मौलालाई केन्द्रबिन्दु बनाएर दिउँसो २ः४३ बजे ५ दशमलब ९ म्यानिच्युडको भूकम्प गएको भुकम्पमापन केन्द्रले जनाएको छ । भूकम्पपछि सुरक्षित स्थानतर्फ भाग्न खोज्दा जयपृथ्वी नगरपालिका वडा नं ११ का ५२ वर्षीय हरिकृण्ण जोशी घाइते भएका छन् । उनलाई उपचारका लागि धनगढी सिफारिस गरिएको छ ।
भूकम्पको धक्काले सदरमुकाम चैनपुरमा रहेको कृषि ज्ञान केन्द्रको भवन, जिल्ला अस्पताल, केही होटल र निजी घरमा पनि क्षति भएको छ । कृषि ज्ञान केन्द्रको भवनमा सशस्त्र प्रहरी बस्दै आएका छन् । यस्तै सुर्मा गाउँपालिकामा रहेको प्रहरी चौकीको भवनमा पनि क्षति पुगेको जिल्ला प्रहरी कार्यालयका प्रवक्ता प्रहरी निरीक्षक रमेश अवस्थीले बताउनुभयो । भूकम्पका कारण जयपृथ्वी नगरपालिका, बुङगल नगरपालिका, सुर्मा, मष्टा, तलकोट, खप्तडछान्ना, थलारा र साइपाल गाउँपालिका स्थित थुप्रै निजी घर र विद्यालय, स्वास्थ्य चौकी जस्ता सार्वजनिक संरचनाहरुमा क्षति पुगेको विवरण प्राप्त भएकोे प्रहरीले जनाएको छ ।
मस्टा गाउँपालिका वार्ड नम्बर २ मा रहेको घटाल देव मंगल प्रा बि को ४ कोठे बिध्यालय भवन , मिनेश रोकाया र दिनेश रोकाया को दुईवटा घर , एउटा चर्पी सँगै दुईवटा भैंसी छाना भत्केको र गाउँ भरीका प्रत्यक घरहरुमा क्षती पुर्याएको मष्टा गाउपालिका वडा नमबर ४ का वडा अध्यक्ष उत्तम राज जोशीले बताउनुभयो ।
जिल्ला भरी ’दर्जनौँ घर भत्किएको खबर आइरहेका छन् क्षतिको यकिन विवरण आइसकेको छैन, क्षतिको विवरण संकलन गर्ने काम भइरहेको जिल्ला प्रहरी कार्यालयका प्रवक्ता प्रहरी निरीक्षक रमेश अवस्थीले बताउनुभयो ।
भूकम्पको धक्काले थुप्रै घरहरु चर्किएको स्थानीयहरूले बताएका छन् । गाउँमा थुप्रै घर चर्किएकाले आरामले भित्र बस्न पनि त्रास फैलिएको स्थानीयहरूको गुनासो छ । यसअघि कात्तिकको तेस्रो साता डोटीमा ६.६ म्याग्निच्युडको भूकम्प गएको थियो त्यस यता सयौं परकम्प गएका थिए ।
