हात खुट्टा भाचेर बझाङ्ग घरभएका शिक्षकलाई रामेछापमा मारियो

label सुदूर खबर संवाददाता query_builder March, 26 2019

बझाङ : बझाङ जिल्लाको दुर्गाथली गाउँपालिका–६, चुवावन स्थायी घर भएका शिक्षक मोहन महत रामेछापको उत्कृष्ट विद्यालयको रुपमा परिचित सुनापति गाउँपालिका–६ डहुको श्री डहु माध्यामिक विद्यालयमा २०७२ सालदेखि अध्यापन गराउँदै आएका थिए।

उनी उक्त विद्यालयका एकेडेमिक इन्चार्ज समेत थिए। फाल्गुन २१ गते विद्यालयको शौचालय नजिकै घाइते अवस्थामा भेटिएका उनी घाइते सँगसँगै बेहोसी अवस्थामा समेत थिए। विद्यालयकै दुई शिक्षकले उनलाई बेहोसी अवस्थामा देखेपछि शिक्षिका शुधा महत, शिक्षक राकेश लामा, खेन्पो लामा र गुरु पाल्देन लामाको सहयोग मार्फत उपचारको लागि उनलाई धुलिखेल अस्पताल पुराइएको थियो।

धुलिखेल अस्पतालबाट उनी काठमाडौँको केएमसी अस्पतालमा रेफर भए । १२ दिन पछि काठमाण्डौको केएमसी अस्पतालमा उपचारकै क्रममा उनको चैत ३ गते निधन भएको थियो ।

महतको सम्पूर्ण उपचार खर्च विद्यालयले नै बेहोरेको छ। मृत्यु पश्चात परिवारले महतको शव बुझ्न मानेनन्। दोषीलाई कारवाही नभएसम्म शब नबुझ्ने भन्दै पिडितपक्षले आफ्नो गुनासो पोखेका थिए।

उनीहरुलाई अनुसन्धान भइरहेको छ भनेर झुलाइएको महसुश भएपश्चात भने मृतकको परिवारले शव बुझी चैत्र ९ गते शनिबारको दिन अन्तिम दाहसंस्कार गरेका छन् ।

घटना घटेको एकदिन अघि महतले आफ्नी श्रीमती शान्ति महतलाई फोनमा आफूलाई प्रिन्सिपलले दबाब दिएको र ज्यानको खतरा भएकोले घर आउने जानकारी दिएका थिए। त्यसपछि श्रीमतीले हुन्छ आउनुहोस् भनिन् । उनी त आएनन् तर उनको घाइते अवस्थाको समाचार भने उनीसमक्ष आइपुग्यो।

मृतकको दुई छोरा छन् । पारिवारिक खर्च सबै मृतकको कमाइको भरले धानिदै आएकोले अब उनको मृत्यु पश्चात परिवारको बिचल्ली नपारि राहत दिन सरकार समक्ष मृतकका भाई वीरबहादुर महतले अपिल गरेका छन् ।

पोस्टमाटमको रिपोर्ट अहिले सम्म आइपुगेको छैन। मृतकको खुट्टा तिन ठाउँमा फ्याक्चर भएको, हात भाचिएको र शरीरमा निलडाम भएको मृतकको श्रीमतीको भनाई छ।

घटनाको प्रकृति हेर्दा विद्यालयमा नै नियोजित ढंगले घटना घटाइएको पिडित परिवारको शंका रहेको छ। मृतकका ससुराको भनाई अनुसार विद्यालयमा तीन दिन अघि दखि सिसी क्यामेरा नचल्नु, सोही दिन गार्डलाई बिदा दिनु अनि बेलुकाको ८ बजेसम्म ट्युसन कक्षा सञ्चालन गर्नुले घटना झन् रहस्यमय बनेको छ।

प्रहरीले अनुसन्धान गरेको बताए पनि अहिलेसम्म कसलाई अनुसन्धानको घेरामा राखेर के गरिरहेको छ भन्ने कुरामा पिडितपक्षका परिवार अनविज्ञ छन्। त्यसैले पनि पिडितपक्षले अनुसन्धान गर्न थुनामा राखेको व्यक्ति सार्वजनिक गरिदिन प्रहरीसमक्ष माग गरेको छ

गोर्खाली खबर बाट साभार

तपाईंको प्रतिक्रिया दिनुस्
सुदूर खबर संवाददाता

सुदूर खबर संवाददाता

सुदूर खबर अनलाइन मिडिया प्रा.लि. द्वारा सञ्चालित यो (www.sudurkhabar.com) सुदूर पश्चिमको पहिलो र एक मात्र आधिकारिक अनलाइन न्यूज पोर्टल समयानुसार पाईलाहरु अगाडि बढाउँदै सही सूचना र निश्पक्ष समाचार सम्प्रेषण गर्न हामी तपाई माझ उपस्थित छौँ ।